N’ai soing de deniers ne d’avoir.
Mès, biaus oncles, dites moi voir
Se li prestres est revenuz.
— Nenil ; bien fui secoruz ;
Jamès aparçuz n’en serai.
— Ha ! biaus oncles, je vous dirai
Une bone chetiveté ;
Quant j’oi le prestre acouveté,
Or escoutez que il m’avint :
Li prestres devant moi revint
Quant je dui entrer en la vile ;
Eschaper me cuida par guile,
Et je li donai du havel
Si durement que le cervel
Li fis espandre par la voie.
A tant le pris ; si me ravoie
Par la posterne là aval ;
Si l’ai geté en contreval ;
En une rasque l’ai bouté. »
Et, quant Jehanz ot escouté
La réson que li dist ses nièz.
Si dist : « Bien en estes vengiéz. »
Après dist bas tout coiement :
« Par foi, or va plus malement,
Que cil n’i avoit riens mesfet[1] ;
Mès teus compère le forfet
Qui n’i a pas mort deservie.
A moult grant tort perdi la vie
Li prestres qu’Estormis tua,
- ↑ 423 et 585 — meffet, lisez mesfet.