N’i a mes gueres de la nuit ;
De legier le poez veillier. »
Lors se départent li bouvier ;
Si font grand feu por aus chaufer ;
Entr’aus conmencentà parler ;
Du prestre et de s’aventure
Li uns à l’autre si murmure :
Quant assez orent murmuré,
Et dit, et fet et raconté,
Si reparolent du mengier ;
C’est la costume du bouvier ;
Jà n’en ert liez s’il ne menjue.
Rogiers, qui porte la maçue
Desus toz cels de la meson,
Conmande c’on voist au bacon
Et aporce on[1] des charbonées,
Mès qu’eles soient granz et lées,
Si que chascuns en ait assez.
Entruès est Berengiers levez
Par le Rogier conmandement ;
Un coutel prist isnelement,
Qui d’acier est bien esmoluz.
Tant a alé qu’il est venuz
Droit au chapel, où li bacons
Estoit penduz sus les bastons ;
Berengiers va par tout tastant
Le plus cras à son esciant,
Quar il set bien que el plus cras
Est tout adès li mieudres lars.
Endementiers que il le taste,
- ↑ 787 — apoice-on, lisez aporce on.