Yssu[1] sont fors à ost bennie
Toute la noble compeingnie,
Mais que .II. Chevalier, qui jurent
Au lit por ce que blecié furent.
Li uns avoit le col plaissié,
Et li autres le bras brisié ;
Esté avoient au tournoi
Où pris avoient ce bonoi.
Cilz au bras bien se contenoit ;
L’autres point ne se soustenoit,
Car dou mal l’esconvint mourir,
Et de cest siecle defenir.
Evous[2] le grant assaut repris
Contre nos Chevaliers de pris ;
Moult fu fors li abatéis
Des mescrens, et li feréis ;
Bien estoient .XV. millier,
Sarrasin, Persans et Escler[3].
Ainsis avint, que Dex le vot,
C’unne cité près d’anqi ot,
Où avoit Crestiens en treuage
Des Sarrasins et en servage,
Qu’oïrent dire la novèle
Que des Chrestïens la rouèle
Aloit à grant perdicion,
Se d’ax n’avient subvencion.
Il s’arment et aidier lor vont ;
Les Sarrasins desconfit ont ;
Tant chaplèrent et tant ferirent
Que les Sarrasins desconfirent ;
Page:Montaiglon - Recueil général et complet des fabliaux des 13e et 14e siècles, tome I.djvu/324
Cette page a été validée par deux contributeurs.
296
51
fabliau xxvi
