Page:Montaiglon - Recueil général et complet des fabliaux des 13e et 14e siècles, tome I.djvu/349

80

321

de l’aveine pour morel

80Et tu soies de ce certainne
Que je l’en donrai volentiers
Selonc ce qu’il sera mestiers
Et je pourrai et tu vourras,
Car jà à ce tu ne faurras. »
85Cele li respont com cortoise :
« Biax frères douz, de ce t’aquoise,
Jà por cel ne te hucherai,
Ne là por ce ne te dirai
Que Moriax vuille avainne n’orge ;
90Miex ain^[1] c’on me couppast la gorge
Que je tel outrage féisse
Ne qu’ainsis huchier apréisse. »
Cilz li respondit erramment :
« Si feras, car jel te comment,
95Car c’est tout un entre nous deuz,
Car je vuil tout ce que tu veuz ;
Donc ce que vueil tu dois voloir,
Sens toi en nul endroit doloir. »
Cele li a respondu tost
100Et seli dist : « Tu ies tous sos,
Qui veus que die tel outrage ;
N’afiert à fame qui soit sage. »
Et sachiez, que qu’ele déist,
Que moult volentiers le féist ;
105Jà pour danmage nel’ laissast,
Ne pour honte, que ne huchast
A Morel avainne donner ;
Miex s’amast à ce abandonner
Qu’ele sa provande perdist.

1. 90 — aim, lisez ain.