Page:Montaiglon - Recueil général et complet des fabliaux des 13e et 14e siècles, tome I.djvu/60

32

229

fabliau iii

Qui riches ert à desmesure ;
230N’i voloit querre entreprisure.
Li chevaliers se porpenssa,
Un jor et autre molt penssa
À la vie qu’il demenoit,
Quar molt sovent l’en souvenoit.
235Venu li est en son corage
Ou tort à joie, ou tort à rage.^[1]
Qu’à l’ancien parler ira,
Et sa fille li requerra
A moillier, que que il aviegne,
240Quar il ne set que il deviengne
Por la vie que il demaine.
Trestoz les jors de la semaine
Ne puet avoir ce qu’il couvoite^[2],
Quar trop li est la voie estroite.
245.I. jor s’apresta de l’aler ;
A l’ancien ala parler
Au leu tout droit où il manoit,
Là où la damoisele estoit.
Assez i fu bien recéus,
250Quar molt estoit bien connéus
De l’ancien et de ses genz ;
Et cil, qui ert et preus et genz
Et empariez comme vaillanz
En qui nus biens n’estoit faillanz.
255Lui a dit : « Sire, je sui^[3] ci
Venus ; par la votre merci
Or entendez à ma reson.
Je sui en la vostre meson

1. 236 — Ou soit à joie, ou soit à rage, lisez Ou tort à joie, ou tort à rage.
2. 243 — convoite, lisez couvoite.
3. 255 — suis, lisez sui.