Fu d’aler là où il devoit,
Et qui la voie bien savoit,
A tant alée s’ambléure
Que venuz est grant aléure
Au chief de celé forest grant.
Une eve avoit en .I. pendant
Qui là coroit grant et obscure ;
Li vairs palefrois à droiture
I est alez[1], qui légué sot ;
Outre passe plus tost que pot ;
N’ot guëres esloingnié le gué
Qui pou estoit parfont et lé,
Quant la pucele oï corner
Cele part où devoit aler
Li vairs palefrois qui le porte ;
Et la guete ert desus la porte.
Devant le jor corne et fretele.
Cele part vait la damoisele ;
Droit au recet en est venue,
Molt eshabie et esperdue,
Si com cele qui ne set[2] pas
Ne le chemin ne le trespas,
Ne comment demander la voie.
Ainz li palefrois de sa voie
N’issi ; si vint desus le pont,
Qui sist sor .I. estanc parfont ;
Tout le manoir avironoit ;
Et la guete qui là cornoit
Oï desus le pont l’effroi
Et la noise du palefroi,
Page:Montaiglon - Recueil général et complet des fabliaux des 13e et 14e siècles, tome I.djvu/89
Le texte de cette page a été corrigé et est conforme au fac-similé.
1099
61
du vair palefroi