I est alez isnelement
Et tuit li baron ensement.
Quant à l’ostel furent venu,
Richement furent reçéu :
Mesire Guillaume fist joie
Molt grant, com cil qui de sa proie
Estoit molt liez en son corage.
Graer covint le mariage
À l’ancien, vousist ou non,
Et li viex au fronci grenon
S’en conforta plus biau qu’il pot.
Seignor, ainsi Dame-Dieu plot
Que ces noces furent estables,
Qui à Dieu furent couvenables[1].
Mesire Guillaume fu preus,
Cortois et molt chevalereus ;
Ainz sa proesce ne lessa,
Mès plus et plus s’en efforça :
Bien fu de princes et de contes.
Ainz le tiers an, ce dist li contes,
Morut li anciens, sanz faille ;
Tout son avoir li rent et baille ;
Toute sa terre ot en baillie,
Qui molt ert riche et bien garnie.
.M. livrées tint bien de terre.
Après ala la mort requerre
Son oncle, qui molt estoit riches,
Et cil, qui n’estoit mie nices,
Ne de cuer povres ne frarins,
Ne blastengiers de ses voisins.
- ↑ 1322 — convenables, lisez couvenables.
Imbert a imité ce fabliau.
