« Guillaumes, dites, beax amis,
Quex maus vos a ainsi sorpris ;
Dites moi conment il vos est.
— Sire, » fait-il, « malement m’est.
Une molt grant dolor me tient ;
Une goute, qui va et vient,
Me tient es menbres et el chief ;
Ge ne cuit que jamais en lief.
— Ne[1] porriez-vos menger ne boivre ?
— Ge nel’porroie pas reçoivre
Nule riens c’onques Diex feïst. »
La Dame plus ne se tenist.
Qui la deüst vive escorchier :
« Sire, par Dieu, ce n’a mestier ;
Guillaume dit sa volenté.
Mais ge sai bien de vérité
Quex maus le tient et où en droit.
Ce n’est mie du mal du doit,
Ainz est un maus qui fait suer
Ceus qui l’ont et souvent tranbler. »
Puis dist à Guillaume la Dame :
« Sire, se Diex ait part en m’ame,
Guillaume, se vos ne mengiez,
Or est li termes aproschiez
Que vos ne mengerez jamais.
— Dame, » dit-il, « ge n’en puis mais ;
Vostre plaisir poez bien dire.
Ma dame estes et il mes sire,
Mais ne porroie pas mengier
Por toz les menbres à tranchier.
- ↑ 509 — « Ne » manque au ms.