N’avés maison, n’avés ostel
U vous le puissiés bien[1] mener ;
En court terme et en peu de tans
Porrés vous[2] mout avoir d’enfans.
Alés encor maistre servir,
Car vous ne porrés mie issir. »
Chiex respont : « Certes, non ferai,
Jamais vilain ne servirai.
Mais, se vous volés, s’i soiiés ;
Se vous volés, si le laissiés.
Et, se ce non, vous di je bien
Que pour vous n’en demourra[3] rien. »
Dont li respont .I. siens parens :
« Marie toi hardiement,
Et, se tu n’as mie[4] un ostel.
Je te presteroie un cambrel. »
Et chiex respont : « Moût volentiers »,
Qui bien set qu’il en iert mestiers.
Si s’en revient vers sen amie ;
Cheroit[5] fait k’il l’a fianchie ;
Li prestres fait ses bans hanster
Et dons[6] li pramet à donner ;
Et si n’a nient tant esparnié
Qu’il ait .X. saus de ses deniers
De quoy il peust ses noches faire ;
Si l’en converra meschief faire.
Si va .I. sien ami proier
Tant k’il ait .X. saus de deniers,
Et li a en couvent, sans faille,
Que des deniers de revidaille
Page:Montaiglon - Recueil général et complet des fabliaux des 13e et 14e siècles, tome II.djvu/180
Le texte de cette page a été corrigé et est conforme au fac-similé.
166
290
fabliau xliv
![](http://upload.wikimedia.org/wikipedia/commons/thumb/9/97/Montaiglon_-_Recueil_g%C3%A9n%C3%A9ral_et_complet_des_fabliaux_des_13e_et_14e_si%C3%A8cles%2C_tome_II.djvu/page180-1024px-Montaiglon_-_Recueil_g%C3%A9n%C3%A9ral_et_complet_des_fabliaux_des_13e_et_14e_si%C3%A8cles%2C_tome_II.djvu.jpg)