FABLIAU LXX
Qui à trestot le sien pooir
Destruit et essille son cors
Por son seignor qui estoit mors
« Voiz tu, » dit il à l’escuier,
« Cele dame là essillier
Son cors ? N’a mie son cuer lié.
Certes mout en ai grant pitié.
— Pitié au deable vos tient,
Quant il li de pitié vos vient :
Je gagerai, se vos volez,
Par si que de ci vos tornez,
Que ja à mout petit de plet,
Si dolente comme el se fait,
La foutrai, mès que vos traiez
En tel lieu que ne nos voiez.
— Qu’as tu dit, escommeniez ?
Je croi que pas crestiens n’ies,
Ainz as ou cors le vif deable
Quant contrové as or tel fable.
— Est ce fable ? Je gageroie
Vers vos, se gagier m’i osoie.
— Or i parra que tu feras ;
Ja par moi veüs n’i seras.
Repondre m’irai soubz cel pin. »
Cil descent jus de son roncin
A la terre et fet chiere morne ;
Vers la dame sa voie atorne ;
Si dit en bas, non pas en haut :
« Chère suer, » dit il, « Deus vos saut !
— Saut ? » fet ele, « mès doinst la mort,
