La damoisele, c’est la voire,
Estoit amie à un provoire :
Mout l’amoit cil et ele[1] lui,
Et si ne lessast por nului
Qu’ele ne feïst son voloir,
Cui qu’en deüst le cuer doloir.
.I. jor au partir de l’eglise
Ot li prestres fet son[2] servise ;
Ses vestemenz lest à ploier,
Et si vint[3] la dame proier
Que le soir en un boschet viengne :
Parler li veut d’une besoingne,
Où je cuit[4] que pou conquerroie,
Se la besoingne vous nommoie.
La dame respondi au preste[5] :
« Sire, vez me ci toute preste,
Cor est[6] il et poins et seson,
Ausi n’est pas[7] cil en meson. »
Or avoit en ceste[8] aventure,
Sanz plus itant de mespresure,
Que les mesons n’estoient pas
L’une lez l’autre à .IIII. pas ;
Ainz[9] i avoit, dont mout lor poise,
Li[10] tiers d’une liue Françoise ;
Chascune ert en un espinois
Con ces mesons de Gastinois.
Mès li boschès que je vous nomme,
Estoit à ce vaillant preudomme
Qu’à[11] Saint Ernoul doit la chandoile.
Le soir qu’il ot ja mainte estoile
Page:Montaiglon - Recueil général et complet des fabliaux des 13e et 14e siècles, tome III.djvu/203
Le texte de cette page a été corrigé et est conforme au fac-similé.
48
193
de la dame qui fit .iii. tors