Page:Montaiglon - Recueil général et complet des fabliaux des 13e et 14e siècles, tome IV.djvu/120

Prent, si l’aguise d’un coutel ;
Puis est montez sor le bordel,
Si le descuevre iluec endroit
Là où la chaudière boilloit.
Tant osta de la couverture,
Que il vit par mi l’ouverture
La fame Travers sommeillier.
Qui lassée estoit de veillier :
La teste aloit jus embronchant.
Et cil avale le perchant,
Qui plus estoit aguz d’un dart ;
Par mi une pièce de lart
Le fiert si droit comme à souhait ;
Hors de la chaudière l’atrait.
Ainsi qu’il amont la levoit,
S’esveille Travers, et le voit,
Qui fors lerres ert et rubestes :
« Seignor, » dist il, « qui lasus estes,
Vous ne me fêtes pas reson,
Qui me descouvrez ma meson ;
Ainsi n’avrons nous jamès fait.
Partez si que chascuns en ait,
Du bacon, et si descendez :
Prenez en, et si m’en donez,
Que chascuns en ait sa partie. »
Cil descent et si ont partie
La char Travers, voiant ses ieus,
Et si en firent .III. moncieus ;
N’i lesserent que sozpeser
Sa fame font les loz giter,