lité, ou difficulté, ou noblesse, comparer aucun de ses ouurages, au chemin qui se voit au Peru, dressé par les Roys du païs, depuis la ville de Quito, iusques à celle de Cusco (il y a trois cens lieuēs) droit, vny, large de vingt-cinq pas, paué, reuestu de costé et d’autre de belles et hautes murailles, et le long d’icelles par le dedans, deux ruisseaux perennes, bordez de beaux arbres, qu’ils nomment, Moly. Où ils ont trouué des montaignes et rochers, ils les ont taillez et applanis, et comblé les fondrieres de pierre et chaux. Au chef de chasque iournee, il y a de beaux palais fournis de viures, de vestements, et d’armes, tant pour les voyageurs, que pour les armees qui ont à y passer. En l’estimation de cet ouurage, i’ay compté la difficulté, qui est particulierement considerable en ce lieu là. Ils ne bastissoient point de mondres pierres, que de dix pieds en carré : ils n’auoient autre moyen de charrier, qu’à force de bras en trainant leur charge : et pas seulement l’art d’eschaffauder : n’y scachants autre finesse, que de hausser autant de terre, contre leur bastiment, comme il s’esleue, pour l’oster apres.Retombons à nos coches. En leur place, et de toute autre voiture, ils se faisoient porter par les hommes, et sur les espaules. Ce dernier Roy du Peru, le iour qu’il fut pris, estoit ainsi porté sur des brancars d’or, et assis dans vne chaize d’or, au milieu de sa bataille. Autant qu’on tuoit de ces porteurs, pour le faire choir à bas, car on le vouloit prendre vif, autant d’autres, et à l’enuy, prenoient la place des morts : de façon qu’on ne le peut onques abbatre, quelque meurtre qu’on fist de ces gens là, iusques à ce qu’vn homme de cheual l’alla saisir au corps, et l’aualla par terre.
CHAPITRE VII.
visqve nous ne la pouuons aueindre, vengeons nous à en mesdire. Si n’est-ce pas entierement mesdire de quelque chose, d’y trouuer des deffauts : il s’en trouue en toutes choses, pour belles et desirables qu’elles soyent. En general, elle a cet euident auantage, a qu’elle se raualle quand il luy plaist, et qu’à peu pres, elle a le
