feront en cecy, selon qu’il sera plus propre à vous et à moy. Les gens de bien ny viuans, ny morts, n’ont aucunement à se craindre des Dieux.Voyla pas vn playdoyé puerile, d’vne hauteur inimaginable et employé en quelle necessité ? Vrayement ce fut raison, qu’il le preferast à celuy, que ce grand orateur Lysias, auoit mis par escrit pour luy : excellemment façonné au stile iudiciaire : mais indigne d’vn si noble criminel. Eust on oui de la bouche de Socrates vne voix suppliante ? Cette superbe vertu, eust elle calé, au plus fort de sa montre ? Et sa riche et puissante nature, eust elle commis à l’art sa defense et en son plus haut essay, renoncé à la verité et naïueté, ornemens de son parler, pour se parer du fard, des figures, et feintes, d’vne oraison apprinse ? Il feit tressagement, et selon luy, de ne corrompre vne teneur de vie incorruptible, et vne si saincte image de l’humaine forme, pour allonger d’vn an sa decrepitude et trahir l’immortelle memoire de cette fin glorieuse. Il deuoit sa vie, non pas à soy, mais à l’exemple du monde. Seroit ce pas dommage publique, qu’il eust acheuee d’vne oysiue et obscure façon ? Certes vne si nonchallante et molle consideration de sa mort, meritoit que la posterité la considerast d’autant plus pour luy. Ce qu’elle fit. Et il n’y a rien en la iustice si iuste, que ce que la Fortune ordonna pour sa recommandation. Car les Atheniens eurent en telle abomination ceux, qui en auoient esté cause, qu’on les fuyoit comme personnes excommuniees. On tenoit pollu tout ce, à quoy ils auoient touché personne à l’estuue ne lauoit. auec eux, personne ne les saluoit ni accointoit : si qu’en fin ne pouuant plus porter cette haine publique, ils se pendirent eux mesmes.Si quelqu’vn estime, que parmy tant d’autres exemples que i’auois à choisir pour le seruice de mon propos, és dits de Socrales, l’aye mal trié cestuy-cy : et qu’il iuge, ce discours estre eslené au dessus des opinions communes ie l’ay faict à escient : car ie inge autrement. Et tiens que c’est vn discours, en rang, et en naïfueté bien plus arriere, et plus bas, que les opinions communes. Il represente en vne hardiesse inartificielle et securité enfantine la