d’homes vetus & masqués de toile qu’on dict estre des jantils homes & autres apparans de Rome, qui se vouent à ce service de accompaigner les criminels qu’on mene au supplice & les cors des trespassés, & en font une confrerie. Il y en a deus de ceus là, ou moines, ainsi vetus & couvers, qui assistent le criminel sur la charette & le preschent, & l’un d’eus lui presante continuellemant sur le visage & lui faict baiser sans cesse un tableau où est l’Image de Nostre Seigneur. Cela faict que on ne puisse pas voir le visage du criminel par la rue. A la potence, qui est une poutre entre deus appuis, on lui tenoit tous-iours cete image contre le visage, jusques à ce qu’il fut élancé. Il fit une mort commune, sans mouvemant & sans parole ; estoit home noir, de trante ans
