Aiols fu chevaliers preus et cortois :
Ylaires et Jobers fu molt adrois,
Si se sont compaignié devant le roi ;
Sor sainz se sont juré, plevi par foi,
Que l’uns ne faura l’autre por riens qui soit.
« Baron, » dist l’enperere, « or estes troi :
« Or poés vos ma guerre miex maintenoir
« Et faire par ma tere tout vo voloir.
« A vous m’an cleim, » fait il, « baron François :
« Sarrasin me demainent a grant belloi
« Et sont a Panpelune, jel sai de voir.
« Un[s] paien[s] le dist chi, que bien en croi,
« Si me vi(e)nt desfier devant François :
« Cuidés vos dont, signor, que ne m’en poist ?
« Signor franc chevalier, qui m’i iroit,
« Certes qui cest message me furniroit,
« Tous les jors de ma vie mon gré aroit,
« Et desist Mibrien qu’il m’atendroit
« Et laisast moi ma terre, bien feroit. »
Dont se teurent Normant et Hurepois
Et Flamenc et Berton et li François ;
Mal ait cil qui s’osast lever des dois,
Tant doutent Mibrien cel riche roi.
Aiols li fieus Elie fu molt cortois,
Qui ses compaignons traist en .i. recoi.
Aiols en apela ses compaignons :
« Entendés, » fait il, « cha, signor baron.
« Dont n’avés vous oi del fil Karlon,
« Qui s’i s’est dementés voiant aus tous,
« Que Sarrasin li tolent tout a bandon
« L’onor que conquist Karles a esperon ?
« Et sont aparellié : car i alons.
« Des crestiens ochient a grant fuison,
« Et dames et puceles ci enfançons.
« Signor, por l’amor Dieu, car i alons ;
