« N’arés jamais par moi honte ne encombrier.
— Sire, » dist Mirabiaus, « merchi por Dieu del ciel !
« D’une feme kaitive car vos prenge pitié ! »
El(e) laist aler les mains, et Robaus est dreciés :
S’ele veist Aiol ne l’eust mais laissié.
Mal ait quant il s’enfuit demi doi ne plain pié !
Il set bien que fuir ne li aroit mestier,
Mais vers Aiol se dreche tout un antieu sentier.
Aiols point Marchegai des esperons d’or mier,
Et a brandie l’anste del roit tranchant espiel :
Vait ferir le laron, si bien a esploitié
Que l’escu de son col li a fraint et perchié
Et l’auberc de son dos desrout et desmaillié ;
Par mi outre le cors li fist passer l’achier ;
Toute plaine sa lanche l’abat mort el sentier,
Puis a traite l’espee, si li trenche le cief,
Si le pent o les autres desor .i. des destriers.
Quant le voit Mirabiaus, s’en ot molt le ceur lié.
La pucele fu lie quant vit le bacheler,
Por chou que il estoit del serpent delivrés.
Ele s’en vint a lui, si l’a araisoné :
« Dites, del serpent, sire, com estes delivrés ?
— Bele, » che dist Aiol[s], « mors est, la merchi Dé !
« Or retornons ariere, je le vos voil moustrer. »
Ariere s’en repairent tout le cemin feré :
Virent le serpent mort, ochis et afolé ;
Li ceval desous eus en sont espaventé :
Cil qui devant aloient sont vers France torné.
Des or s’en va Aiol[s], s’en maine la pucele ;
Desor les .vii. chevaus ot torsees les testes ;
Celes as Sarrasins sont encoistres et laides,
Mais cele al crestien fu toute la plus bele.