Ala Aiol son dru acoler et baissier.
Maintenant en entrerent en la chité d’Orliens,
Et li rois les en maine ens el palais plenier.
Molt par fu grant la joie que fist roi Loeys ;
Il acola Aiol, si l’a a raison mis :
« Gentiex damoiseus sire, bien puisiés vos venir !
« Molt ai estei por vos coureçous et maris :
« Jamais ne vous quidai veir a nes un di(s).
Mais vo[s] deus compaignons a je en cartre mis.
« Se il vos ont forfait ne de riens mal bailli,
« Demain les ferai pendre sans nes un contre dit.
— Sire, » che dist Aiol[s], « se Damelde[x] m’ait,
« Por lor fier vassellage sont issi mal bailli.
« A Panpelune alames, ne vous en quier mentir ;
« Je me fui endormis un merkedi matin
« Et je ne m’esvellai por tot l’or que Dex fist.
« Il fissent lor eskiec comme preu et gentil ;
« Por l’acordanche en vaurent mi home devenir :
« Mais jou tant fui vers aus coureçous et maris,
« Que je ne vauc ainc prendre lor droit nel requellir.
« Car les me rendés, sire, par le vostre plaisir.
— Par foi, molt volentiers, » li rois li respondi,
« Nel vos contrediroie par le cors saint Denis,
« S’or i devoie perdre Estanpes et Senlis. »
Ylaires et Jobers sont de prison fors mis.
Li compaignon Aiol furent molt forment lié
De chou qu’il les avoit loialment tesmongié :
Grant joie font de lui et molt grant amistié.
Lusiane la bele prist Oton de Poitiers ;
Sus el palais le maine, li et le duc Gontier :
Entre Aiol son cousin et Mirabel s’asiet.
La fille Mibrien vaura contralihier :
« Dites, biaus sire Aiol, ceste dame que quiert ?
