« Demain pendrai Aiol par son l’aube esclairie,
« Et Mirabeus ert arse en .i. grant feu d’espine.
— Sire, » dist Guinehos, « je li sarai bien dire. »
Il vint a son ostel, si a ses armes prises,
Et monta el destrier, s’a se voie aquellie,
Et ist fors de la vile par mi la porte antie.
Li mesagiers le roi vient al cors de Makaire,
Bien et cortoisement li conta son message :
« Savés que chi vous mande Loeys li fiex Carle ?
« Que vous a tort tenés ses casteus et ses marces.
« Si vous mande mesires que vos en iretage
« Ceste vile arés quite, n’arés plus de manage :
« Son neveu li rendés et sa mollier le sage.
« Alés a lui parler la jus a cel[e b]are,
« Bien dites vo voloir, car vos n’i arés garde. »
Quant Makaires l’entent, a poi d’ire n’esrage :
« Ami, vo doi signor me requirent outrage.
« Or me dites le roi, voiant tout son barnage,
« Se jel puis encontrer en camp ne en bataille,
« Trencherai lui la teste a m’espee qui taille,
« Puis porterai corone a Paris u a Chartres.
« Demain pendrai Aiol u a fau u a kaine,
« Et Mirabiaus sa feme sera en .i. feu arse. »
Hervieus s’en est tornés, n’a soig de dire outrage ;
Bien a son mès furni, si se met el repaire.
Et Guinehos s’en vient droit al tente de paile.
Tant par fu fel li mès que ne daigna desendre,
Ains s’apoie as arçons, si desploie s’ensenge.
Fierement en apele le rice roi de Franche :
« Ne te salu pas, rois, car on nel me commande.
« Je sui preus et vasaus por mon cors a desfendre :
« Ne fuirai por .iiii. homes, s’en bataille m’atendent.
