« Merchi, sire Makaire, » chou dist Aiol[s] li ber ;
« Por amor Dameldé qui tout a a sauver,
« Quant vos a m’amisté ne volés atorner,
« Prendés moi et ma feme et mes fiex qui sont né,
« Si nous metés tous .iiii. ens el font d’un fossé,
« Tout contreval le Rosne nos en laisiés aler ;
« Et jou vous jurerai volentiers et de gré
« Jamais ne remanrai en la crestienté :
« Dusques en paienie ne vaurai arester ;
« La remanrai tous jors por mes enfants garder. »
Quant l’oi li traitres, sel commenche a gaber ;
Dist a son senescal : « Va moi l’autre aporter :
« Par icel saint apostle c’on quiert en Noiron pré,
« Jamais ne mengerai ses arai desmenbrés. »
Quant l’entendi Aiols, si commenche a plorer.
Cil s’avale en la cartre ; ne fu mie senés
Quant il n’i porta armes por sa vie saver.
Aiol[s] li fieus Elie s’est contremont levés :
« Fiex a putain, » dist il, « com l’osastes penser ?
« Bien sai que jou morai, n’en porai escaper :
« Mais par cel saint apostle qu’on quiert en Noiron pré,
« Comment que li plait prenge, vos l’esteut comperer ! »
Puis s’abaisse a la terre, s’a .i. quarel combré,
Grant et gros et pessant, quanqu’il pot sus lever.
Par molt fier maltalent l’en a amont levé :
Devant en mi le pis li dona .i. cop tel
Que le ceur de son ventre li a par mi crevé.
Encor(e) ne fu il mie de tant al baron sés :
Sel fiert amont el cief, les iex en fait voler.
Makaires fu desore, qui commenche a crier :
« Cuivers, car t’en vien tost, trop aras demoré. »
Cil ne li pot respondre, lés le mur jut tué[s].
Makaires fu deseure qui apela son home :
