branches, et de la maçonnerie. Et parce qu’en ce faisant, les tympanes se trouueront vides et percez à iour : ie mettrai à vn chacun desdits tympanes vne deuise de lettres antiques et romaines, lesquelles lettres seront formees de petites gittes, qui procederont des branches de la corniche, et du frontispice : et ainsi, lesdits tympanes seront enrichis de deuises aussi bien que la frise. Et quant est des deuises qui y seront, ie te les mettray par ordre cy apres. Pour conclusion, sçaches que le cabinet estant ainsi fait, les branches qui croistront au dessus des frontispices et sommité du bastiment, ie les feray coucher l’vne sur l’autre d’vne telle inuention, qu’il ne pleuura aucunement dedans ledit cabinet, non plus que s’il estoit couuert d’ardoise. Voila toute l’edification du premier des quatre cabinets verds.
Le second cabinet verd, qui sera du costé du vent de Est, sera erigé et construit d’hommeaux, en la propre forme que les susdits : mais le rocher du dedans, qui sera ioint auec la muraille de la cloison et fermure du iardin, sera d’vne autre inuention : car il sera massonné de certains cailloux blancs et diaphanes, lesquels i’ay amassez en plusieurs et diuers champs, rochers, et montagnes : et seront lesdits cailloux arrangez, et massonnez en ladite muraille d’vn si bel ordre, qu’il y aura plusieurs riches concauitez et retraittes, qui seruiront d’autant de sieges, pour reposer ceux qui iront audit cabinet : et d’iceluy rocher sortira vn nombre infini de pisseures d’eau, qui feront mouuoir certains moulinets, et les moulinets feront iouer certains soufflets, et les soufflets ietteront leur vent dedans certains flaiols[1], qui seront dedans vn ruisseau, qui sera au pied du rocher, en telle sorte que les soufflets contraindront les flaiols rendre leur voix, eux estans dedans l’eau : dont s’en ensuiuront plusieurs voix de flaiols gargouillantes, qui en leurs gargouillemens imiteront de bien pres les chants de diuers oiseaux, et singulierement, le chant du Rossignol : or ledit rocher sera tenu luisant et net, à cause des eaux qui iournellement distilleront dessus. Et quant est de la deuise, qui sera en la frise dudit cabinet, il y aura en escrit, Les enfans de Sapience, sont l’Eglise des Iustes. Eccles. 3.
- ↑ Flutes, flageolets.
