Ouy, mon fils, pourſuivons ſans les plus eſcouter.
Donnez moy le couſteau : il parle à Sthenobée.
Le voila ;
Sthenobée
A quoy t’amuſes tu, qui t’a perſuadée
Que cette foible lame auroit le meſme effet
Des couſteaux d’autres fois ?
Sçaches en le ſubiet ;
Vois cette femme icy qui te peut ſatisfaire,
Eſcoute ſes raiſons ſans te mettre en colere :
C’eſt elle ſeulement, qui te doit informer
Des vertus de ce fer, qui vient de t’allarmer,
Pour eſtre trop leger.
O Dieux ! quelle ſurpriſe,
Ha ! trompeuſe,
Il eſt vray, Diane m’authoriſe :
Vous Thymœtes ſortez de cet eſtonnement ;
I’apporte icy ce fer par ſon commandement.
Car vous ſçaurez qu’vn iour revenant de la chaſſe,
Ayant couru long-temps elle ſe trouva laſſe :
Mais le Dieu du ſommeil l’ayant fait repoſer,
Quelques momens apres il luy vinſt propoſer
D’aggréer vn repas, elle, & toute ſa ſuitte :
Elle accepte l’honneur où ce grand Dieu l’inuite :
Apres ce doux repas, ce qui luy plûſt le mieux,
Au meſpris des palais riches & precieux,
Ce fuſt pluſieurs ruiſſeaux par des ſi doux murmures
