Cette page a été validée par deux contributeurs.
MORALITÉ.
ON voit icy que de jeunes enfans,
Sur tout de jeunes filles,
Belles, bien faites & gentilles,
Font tres-mal d’écouter toute sorte de gens,
Et que ce n’est pas chose estrange,
S’il en est tant que le loup mange.
Ie dis le loup, car tous les loups ;
Ne sont pas de la mesme sorte ;
Il en est d’une humeur accorte,
Sans bruit, sans fiel & sans courroux,
Qui privez, complaisans & doux
Suivent les jeunes Demoiselles
Iusque dans les maisons, jusque dans les ruelles ;
Mais, hélas ! qui ne sçait que ces loups doucereux,
De tous les loups sont les plus dangereux.
