Page:Petitot - Collection complète des mémoires relatifs à l’histoire de France, 1re série, tome 1.djvu/338

La bibliothèque libre.
Le texte de cette page a été corrigé et est conforme au fac-similé.
320
[1204] de la conqueste

figures taillées dans le marbre, et entre autres une d’un empereur, lequel tomboit à bas d’une colomne ; ayant esté predit il y avoit long-temps qu’un empereur de Constantinople seroit jetté à bas de celle-cy. Et ainsi cette figure fut representée en effect, et la prophetie accomplie.

164. Vers le mesme temps arriva pareillement que le marquis de Montferrat, qui estoit vers Thessalonique, prit l’empereur Alexis qui avoit fait crever les yeux à l’empereur Isaac, avec l’Imperatrice sa femme, et envoya les brodequins de pourpre, et les robes imperiales à l’empereur Baudoüin à Constantinople, lequel lui en sceut fort bon gré : il le fit puis aprés conduire prisonnier au Montferrat

165. Environ la feste de Sainct Martin ensuivant, Henry frere de l’Empereur sortit de Constantinople, et descendit le braz de Sainct George, jusques au détroit d’Abyde, ayant avec luy cent ou six vingt chevaliers, tous braves hommes, et prit terre à la ville d’Abyde, qu’il trouva garnie de tous biens, de vivres, de viandes, et autres commoditez requises pour l’usage de l’homme, s’empara de la ville et se logea dedans, commençant de là à faire la guerre aux Grecs d’alentour, assisté des Armeniens qui s’estoient habituez en ces contrées, lesquels, pour la haine qu’ils portoient aux Grecs, se mirent incontinent de son party.

166. Renier de Trit partit en ce mesme temps de Constantinople, et s’en alla vers Philippople, que l’empereur Baudoüin lui avoit donnée, emmenant quant et luy environ six vingt bons chevaliers ; et fit tant qu’il passa à Andrinople, et vint à Philippople,