la maladie suivie de la mort d’Henry Dandole duc de Venise. Il fut enterré honorablement en l’eglise de Saincte Sophie. Quant se vint à la Pentecoste, le roy de Bulgarie, qui avoit poussé ses conquestes dans les terres de l’Empire sans que personne luy resistât, ne peut plus retenir ses Comains, à cause de la chaleur de l’esté, durant lequel ils n’ont point accoutumé de camper, ni empescher qu’ils ne s’en retournassent dans leurs païs. Et luy avec ses Bulgares, et les Grecs qui tenoient son party, resolut de marcher vers Thessalonique, où lors estoit le marquis ; lequel, ayant eu nouvelles de la deffaite de l’empereur Baudoüin, avoit quitté le siege de Naples, et s’y en estoit retourné avec ce qui luy restoit de trouppes, et l’avoit munie de tout ce qui estoit necessaire.
205. D’autre part le frere de l’Empereur assembla ce qu’il pût de forces, et s’en alla contre les Grecs, jusques à une ville que l’on appelle Tzurulum, qui est à trois journées de Constantinople, laquelle luy fut renduë, les Grecs luy ayans presté serment de fidélité, qui estoit mal observé en ce temps-là. De là il passa jusqu’à la ville d’Arcadiople qu’il trouva vuide, les habitans n’ayans ozé l’y attendre, et en suitte vint à Visoï, place forte et tres-bien garnie qui luy fut renduë. De Visoï il s’achemina à la ville d’Apre, où il y avoit nombre de Grecs ; lesquels, d’abord qu’ils virent les nostres se mettre en posture de les attaquer, demandérent à parlementer : mais tandis que d’un costé on travailloit à arrester la capitulation, ceux de l’armée y entrérent de l’autre, sans que le Regent ny ceux qui estoient employez à dresser les articles en sceussent rien ; dont ils furent fort irritez. Cepen-
