Comains, de Grecs et de Valaches, avec laquelle il fit une irruption dans les terres de l’Empire, la pluspart des villes et chasteaux se rendans à luy. Les Venitiens estans avertis de son arrivée abandonnérent incontinent Arcadiople ; et le Bulgare passant outre vint à Apre, dans laquelle il y avoit garnison de Grecs et de Latins. Branas, qui avoit espousé la sœur du roy de France, en estoit seigneur ; et Begues de Fransures chevalier de Beauvoisis y commandoit les Latins.
216. Le Bulgare y ayant mis le siege l’emporta d’assaut avec un cruel carnage. Begues de Fransures ayant esté amené devant lui, il le fit mettre à mort sur le champ en sa presence, faisant conduire en Valachie tous les autres de moindre condition, Grecs et Latins, avec leurs femmes et enfans. Puis fit abbattre et ruiner de fonds en comble, tant les murailles que les edifices de la ville, qui estoit forte, riche, et située en bon pays : à douze lieuës de là estoit la ville de Rodosto sur la mer, pareillement riche, forte et spacieuse, et tres-bien garnie de Venitiens, où peu auparavant une troupe de chevaux-legers de renfort, en nombre de bien deux mil, y estoit arrivée.
217. Quand ceux de dedans eurent entendu la prise d’Apre, et que le Bulgare avoit fait inhumainement passer par le fil de l’espée tous ceux qui s’estoient trouvez dedans, ils entrérent en telle frayeur qu’ils se deffirent d’eux-mesmes, Dieu permettant ainsi les malheurs. Les Venitiens se jettérent soudain à foulle dans les vaisseaux, et les chevaux-legers qui estoient de France et de Flandres, et des autres endroits,
