France à Paris, par les grandes conquestes et batailles que le roy Henry son pere y avoit faict. Si le roy Henry eut survescu Charles vi son beaupere, il eut appréhendé tout le royaulme. Iceluy royaulme lui avoit été donné par Charles vi ; mais par la pourvoiance divine, qui ne voulut souffrir que le droit héritier de France fust privé de son héritage, le roy Henri d’Angleterre, environ quarante-huit jours avant que le roy Charles vi mourut, vint à clore son dernier jour au bois de Vincennes prés Paris, délaissant un fils agé d’un an ou environ : aprés laquelle mort du roy Henry et du roy Charles vi, Charles daulphin alla à puissance d’armes en la cité de Reims, et là se feit couronner roy de France. Depuis son couronnement il reconquesta Paris, Ponthoise et la plus part de son royaulme : tellement que les Anglois ne tenoient audit an 48 que les duchés et seigneuries cy-dessus dites.
Charles, roi de France, deüement informé que les Anglois faisoient guerre au royaulme d’Ecosse et au roy d’Espaigne ses alliés, et pareillement à ses subjects de La Rochelle, de Dieppe, le tout continuellement, sans rendre ni reparer choses qu’ils faisoient