I
Comment sainct Bernard vint à Clerevaulx, et de la situation d’icelle.
Quant il pleut a Dieu qui avoit séparé sainct Bernard du siècle et l’avoit appellé pour révéler en luy sa gloire, affin que par luy, il assemblast plusieurs enfans de Dieu qui estoient disperser, il inspira le vénérable abbé Estienne d’envoyer des frères pour édifier la maison et abbaye de Clerevaulx. Auxquels quant ils s’en partirent de luy, il bailla sainct Bernard pour estre leur abbé, dont ils furent moult esmerveillez. Car ils estoient tous anciens et meurs et nobles, tant de religion comme de lignage, et sainct Bernard estoit jeune et moindre d’aage, malade de corps et de foible complexion et n’avoit point coustume ne usage de soy occuper ès choses mondaines et pour ce avaient-ils doubte de luy. Ils vindrent donc jusques à Clerevaulx qui est un lieu en l’éveschié de Lengres près de la rivière d’Aube là où estoit une grande larronnière et fosse de larrons. Et anciennement estoit appellé ce dit lieu la vallée d’Amaritude, tant pour cause de ce qu’il y avoit grande habondance d’une herbe amère, laquelle aucuns appellent aloine et en latin est dicte absinthiam : comme pour l’amaritude de la douleur et de l’horreur de ceulx qui y estoient prins ou mys à mort par les larrons. En ce lieu solitaire et plain d’horreur, se logèrent ces sainctz hommes dessus nommez, pour faire de cette larronnière et de cette fosse de larrons ung temple de Dieu et une maison d’oraison, là ou par l’espace de certain temps ils servirent humblement à Dieu, en povreté d’esprit, en souffrant fain et soif, en froidure et nudité, en dormant peu souvent, ils faisoient souvent leur potage de feuilles de faoux. Leur
