Ou autrement maistre baston qui picque
Plus que ne faict l’argument sophistique
Viendra en place, et frappera si hault
Que ne pourras respondre à son assaut.
Pourquoy cela ?
Encore tu demeures
Ne voulant croire à mes parolles seures ?
N’iras-tu pas, espece d’animal
Qui es venu chercher icy ton mal ?
Ne me batz plus, je m’en vay, je te laisse.
Or va-t’en donc, mais va-t’en de vitesse,
Si tu ne veuz que ton individu
D’infiniz coups ne demeure perdu,
Ou que son corps de ma main fiere et rude
N’aille sentant dedans son habitude,
Par accident quelque privation,
Et que son propre à ceste occasion
Soit depery de la substance sienne
Et que jamais le doux ris ne luy vienne.
J’ayme doncq’ mieux m’en aller de ce pas.
Si tu y faulx, je ne te faudray pas :
Et quant à moy, pour fuir la présence
D’un tas de foulz, qui pensent leur science
Vendre aux Cocus qui n’y ont point d’esgard,
Je me retire en ce bois à l’escart.
