Dedans le ciel, et leur Jupiter suivent,
A maintenant nostre garde faussé,
Et malgré nous s’est de tant avancé
Que de passer à travers nostre ville
Et se jetter luy seul contre cent mille.
O grief forfaict ! ô acte audacieux !
Ne sçais-tu point lequel est-ce des Dieux ?
Je n’en sçay rien, car la crainte non vaine
Qui se saisit de mes membres soudaine,
Ne m’a permis que j’eusse le loisir
De l’adviser et connoistre à plaisir ;
Trop bien je sçay qu’il porte au dos des ailles
D’un beau plumage, et luisantes et belles.
Le Roy n’a-t-il semond aucun Cocu
Pour le poursuivre et l’arrester sur cu ?
De grande ardeur et diligence extresme
Il le poursuit en personne luy-mesme,
Accompaigné des Cocus plus vaillans,
Qui de colere et de fureur bouillans
Courent par l’air, pour prendre leur vengeance
De ce Dieu là qui leur a faict offense.
Allons après, hastons-nous, il le fault,
Sus, sus, alarme, au combat, à l’assaut,
Ça, ça, des arcs, ça, des flèches, qu’on s’arme.
