N’ayant mué rien plus que le surnom
Parceque Jean il a eu tousjours nom ;
Et nous, Messieurs, que la fortune exile,
Sommes natifz de Tholoze gentille,
Où Amalthé a longtemps habité,
Et a Jupin là mesmes allaicté,
Non dedans Crete, et pour reconnoissance
Luy a laissé sa corne d’abondance.
Je pense, moy, que nous ne sommes pas
Bien loing du lieu où nous dressons noz pas.
Nous verrons bien, or va-t’en et desserre
Deux ou troys coups avecques une pierre
Dedans ce chesne, et crie à haute voix
Pour voir voler les oyseaux de ce boys.
Hau ! Jean Cocu !
Qui est là ? qui l’appelle ?
Ô ! Apollon quelle chose nouvelle,
Certes, je n’eusse oncques pensé cecy
Que les oyseaux eussent parlé icy.
Et si font bien en Tholoze les bestes.
Ne voulez-vous me dire qui vous estes,
Qui demandez à parler à Monsieur ?
