Affin qu’il soit de son membre escouillé,
Dont feut jadis son ayeul despouillé,
Et que sans mort souffrant mille miseres,
Il soit puny de tous ses adulteres,
Puisque la loy Julie ne peut pas
Luy moyenner, estant Dieu, le trépas.
Si le Dieu Mars veut descendre en la terre,
Pour exciter ceux de Thrace à la guerre,
Bien qu’il soit fier, bien qu’il soit brave, et fort,
Bien qu’avec luy soit le cruel discord,
« Lequel petit quand à naistre il commence,
« Devient plus grand, et tellement s’avance,
« Que jusqu’au ciel du chef il va touchant,
« Et va, hautain, sur la terre marchant : »
Bien qu’Enyon, bien que ceste Bellonne,
Qui de frayeur les plus constans estonne,
Ses escadrons rangent de toutes partz,
Faisant branler les plus braves soldars,
Si faut-il bien que dessouz vous il ploye,
Et devers vous son ambassade envoye
Pour estre amy, ou les hommes jamais
N’auroient la guerre, et ne vivroient qu’en paix.
Il sieroit mieux qu’ils vescussent en vesses.
Que diray plus ? les Dieux et les Deesses
Sur les mortelz n’iront plus s’esmouvant,
S’il ne vous plaist leur permettre devant.
Le Dieu Phoebus de son arc, qu’il desserre,
N’envoyera plus la peste dans la terre,
Comme il la meist sur les Grecs ennemis,
Vengeant le tort vers son prestre commis.
