OVYS par la grace de Dieu, Roy de France & de Nauarre, A tous presens & aduenir, Salut. Il n’y a rien de plus digne de nostre soin que de veiller continuellement & contribuer de nostre auctorité pour augmenter le zele & la pieté de nos subjets au seruice de Dieu en protegeant ceux qui s’occupent aux exercices des vertus, & qui par l’exemple de leur bonne vie attirent nos peuples à leur imitation & causent des benedictions infinies. C’est pourquoi ayans esté bien informez du bon & louable dessein de nostre bien amé Me George Froger, Docteur Regent en la Faculté de Theologie & Curé de l’Eglise S. Nicolas du Chardonnet de nostre bonne ville de Paris en l’establissement d’vne Communauté de Prestres habituez en ladite Paroisse, lesquels se contentans de ce qui prouient de l’Autel & de leurs tiltres pour leur vie, se privent de tous autres reuenus, & n’admettent aucuns bienfaits en ladite Communauté, soit par disposition entre vifs, ou à cause de mort ny en quelque autre sorte & maniere que ce soit, viuans dans cette simplicité & peu de soin des choses de ce monde pour s’employer és fonctions Ecclesiastiques & Paroissiales, ainsi qu’il est plus amplement déclaré en vne conuention passee le 26 Iuillet dernier, entre ledit Froger & les Prestres d’icelle Communauté, laquelle a esté receu par ’applaudissement commun de tous les
