Reuerendissime Archeuêque de Paris.
vpplient humblement les Paroissiens de S. Nicolas du Chardonnet à Paris : Disans que depuis vingt ans ou environ, les Prestres habituez en ladite Eglise ont commencé de viure en commun soubs la direction & authorité de Monsieur Froger leur Curé, & se sont tellement employez au seruice d’icelle Eglise, que les supplians en ont receu toute sorte d’assistance & consolation spirituelle, tant en santé qu’en maladie. Et parce que leur Communauté Ecclesiastique ne peut estre en l’estat qu’il est à desirer si elle n’est approuvee & confirmee par leurs Superieurs
sans le consentement & authorisation desquels elle ne peut subsister,
les supplians ont estimé necessaire de vous rendre les tesmoignages de la grande satisfaction qu’ils ont desdits Prestres habituez, & à cet effect vous presenter leur tres humble requeste, à ce qu’il vous plaise, Monseigneur, confirmer & authoriser ladite Communauté Ecclesiastique, laquelle n’est en façon quelconque a charge ; au contraire est au grand soulagement & contentement de toute ladite Paroisse. A ces causes, Monseigneur, il vous plaise approuuer, authoriser & confirmer ladite Communauté des Prestres habituez en ladite Eglise, pour y viure & demeurer en commun soubs les conditions portees es conuentions d’icelle Communauté faictes sous vostre bon plaisir entre ledit sieur Curé & lesdits Prestres, le vingt six Iuillet mil six cens trente vn, & lesdits supplians continueront leurs prieres enuers Dieu pour vostre conservation & prosperité. Ainsi signé, Despesses, Goisel, Biterne, P. Alexandre, Marguillers de S. Nicolas du Chardonnet, de Villemontée, Gaumin, Texier, Hanapier, Gourreau la Proutiere, Fauereau, Martin, Guerin, Maugis, L. Boyuin, Boyuin Abbé de Montmorel, Seuin, Brethe, Fournier, Chauuelin, I. de Vassé, Bellestat, Compaing de l’Estant, Iaques Compaing, Iaquet, François Veron, Bouchet, du Verger, Chamillard, du Pré, Regin, Noyau,