de picques noires. Diogenes[1], respondit Pantagruel, ung iour s’esbattre
voulant, visita les archiers qui tiroyent a la butte. Entre
iceulx ung estoyt tant faultier[2], imperit et mal adroict, que lorsqu’il
estoyt en ranc de tirer, tout le peuple spectateur s’escartoyt de
paour d’estre par luy feru[3]. Diogenes l’auoyt ung coup veu si peruersement
tirer que sa flesche tumba plus d’ung trabut[4] loing de la
butte ; au second coup, le peuple loing d’ung cousté et d’aultres
s’escartant, accourut et se tint en piedz iouxte le blanc, affermant
cestuy lieu estre le plus seur : et que l’archier plustoust feriroyt tout
aultre lieu que le blanc : le blanc seul estre en seureté du traict.
Ung paige, dist Gymnaste, du seigneur d’Estissac, nommé Chamouillac,
apperceut le charme. Par son aduis Perotou changea de
blanc, et y employa les papiers du proces de Pouillac. Adoncques tirarent
tresbien et les ungz et les aultres. A Landerousse, dist Rhizotome,
es nopces de Iean Delif, feut le festin nuptial notable et
sumptueux, comme lors estoyt la coustume du pays. Apres soupper,
feurent iouees plusieurs farces, comedies, sornettes plaisantes ; feurent
dancees plusieurs moresques aux sonnettes et timbous[5]: feurent
introduictes diuerses sortes de masques et mommeries. Mes
compaignons d’eschole et moy, pour la feste honnorer a nostre pouoir,
car au matin nous tous auions eu de belles liurees[6] blanc et
violet, sus la fin feismes ung barboire[7] ioyeulx auecques force coquilles
de sainct Michel, et belles cacquerolles de limassons. En faulte
de colocasie, bardane, personate[8] et de papier, des fueilletz d’ung
vieil Sixiesme, qui la estoyt abandonné, nous feismes nos faulx visaiges[9], les descoupans ung peu a l’endroict des oeilz, du nez et de
la bouche. Cas merueilleux. Nos petites carolles[10] et puériles esbatemens
acheuez, oustans nos faulx visaiges, appareusmes plus hideux
et villains que les diableteaulx de la Passion de Doué, tant auions
les faces guastees aux lieux touchez par lesdictz feuilletz. L’ung y
auoyt la picote[11], l’aultre le tac, l’aultre la verolle, l’aultre la rougeolle,
l’aultre gros froncles[12]. Somme, celluy de nous tous estoyt le
moins blessé à qui les dentz esloyent tumbees. Miracle, s’escria Homenaz,
miracle. Il n’est, dist Rhizolome, encores tempz de rire. Mes
deux soeurs, Catharine et Renée, auoyent miz dedans ce beau
Sixiesme, comme en presse, car il estoyt couuert de grosses aisses[13],
et ferré a glaz[14], leurs guimples, manchons et collerettes sauonnees
de frais, bien blanches et empesées. Par la vertus dieu. Altendez,
dist Homenaz, duquel dieu entendez vous ? Il n’en est qu’ung, respondit
Rhizotome. Ouy bien, dist Homenaz, es cieulx : en terre n’en
auons nous ung aultre ? Arry[15], auant, dist Rhizotome, ie n’y pensoys,
par mon ame, plus. Par la vertus doncques du dieu pape en
terre, leurs guimples, collerettes, baueretles, couurechiefz et tout
aultre linge y deuint plus noir qu’ung sac de charbonnier. Miracle,
- ↑ Voy. Diogène Laerce, Vie de Diog. le Cyn.
- ↑ Fautif.
- ↑ Frappé.
- ↑ Longueur d’une perche.
- ↑ Tambours de basque.
- ↑ Rubans de noces.
- ↑ Mascarade.
- ↑ Grande-bardane.
- ↑ Masques.
- ↑ Danses en rond.
- ↑ Petite vérole.
- ↑ Clous.
- ↑ Gros ais[illisible].
- ↑ Glace
- ↑ Cri des âniers en Languedoc.