Du gouuernement, & seigneur de ceste année.
Chapitre premier.
velqve chose que vous disent ces
folz Astrologues de Louain, de
Nurnberg, de Tubinge, & de
Lyon, ne croyez que ceste année
y aie autre gouuerneur de l’vniuersel
monde que Dieu le createur,
lequel par sa diuine parole
tout regist, & modere, par laquelle sont toutes
choses en leur nature, & proprieté, & condition :
& sans la maintenance, & gouuernement duquel
toutes choses seroient en vn moment reduictes à
neant, comme de neant elles ont esté par luy produictes
en leur estre. Car de luy vient, en luy est,
& par luy se parfaict tout estre, & tout bien : toute
vie & mouuement, comme dist la trompette euangelicque
monseigneur sainct Paul Ro. xj. Doncques
le gouuerneur de ceste année, & toutes autres
selon nostre veridicque resolution sera Dieu tout
puissant. Et n’aura Saturne, ne Mars, ne lupiter,
ne autre planete, certes non les anges, ny les
saincts, ny les hommes, ny les diables, vertuz, effi-