Page:Rabelais marty-laveaux 03.djvu/292

La bibliothèque libre.
Le texte de cette page a été corrigé et est conforme au fac-similé.
284
la cresme philosophalle

Vtrùm, la froidure hybernalle des Antipodes, passant en ligne orthogonalle par l’omogence solidité du centre, pourroit par vne doulce antiperistasie eschauffer la superficielle connexité de noz talons.

Vtrùm, les pendans de la zone torride pourroyent tellement s’abbreuuer des cataractes du Nil, qu’ils vinssent à humecter les plus caustiques parties du ciel Empiree.

Vtrùm, tant seulement par le long poil donné à l’ourse metamorphosee, ayant le derriere tondu à la bougresse pour faire vne barbutte à Triton, pourroit estre gardienne du pol Articque.

Vtrùm, vne sentence elementaire pourroit alleguer prescription decennalle contre les animaux amphibies, & è contra l’autre respectiuement former complaincte en cas de saisine & nouuelleté.

Vtrùm, vne grammaire historique & metheorique, contendantes de leur anteriorité & posteriorité par la triade des articles, pourroyent trouuer quelque ligne ou charactere de leurs croniques sur la palme Zenonique.

Vtrùm, les genres generalissimes par violente eleuation dessus leurs predicaments, pourroyent grimper iusques aux estages des transcendentes, & par consequent laisser en friche les especes speciales & predicables, au grand dommaige & interest des pauures maistres es arts.

Vtrùm, l’omniforme Prothee se faisant cigale, & musicalement exerçant sa voix es iours caniculaires, pourroit d’vne rosee matutine soigneusement emballee au mois de May, faire vne tierce concoction deuant le cours entier d’vne escharpe Zodiacale.

Vtrùm, le noir Scorpion pourroit souffrir solu-