trueux Galion, composé de deux les plus grans vaisseaux, qui fuissent en ceste marine : lesquelz lon auoit fait monter d’Hostie & Porto à force de beufles. Et apres plusieurs ruses, assautz, repoulsemens, & autres vsances de bataille nauale, sus le soir lon mettroit le feu dedens iceluy Galion. Il y eust eu vn terrible feu de ioye, veu le grand nombre & quantité de feuz artificielz, qu’on auoit mis dedens. Ia estoit iceluy Galion prest à combatre : les petis vaisseaux prestz d’assaillir, & peintz selon les liurees des Capitaines assaillans : auecques la pauesade & chorme bien galante. Mais ce combat fut obmis, à cause d’vne horrible crue du Tybre, & vorages par trop dangereuses : comme vous sauez, que c’est vn des plus inconstans fleuues du monde, & croit inopinément non seulement par esgoutz des eaues tombantes des montaignes à la fonte des neiges, ou autres pluies : ou par regorgemens des lacs, qui se deschargent en iceluy : mais encores par maniere plus estrange par les vents Austraux qui soufflans droit en sa boucque pres Hostie, suspendant son cours, & ne luy donnans lieu de s’escouller en ceste mer Hetrusque, le font enfler & retourner arriere, auecques miserable calamité, & vastation des terres adiacentes. Adioint aussi que deux iours deuant auoit esté fait naufrage d’vne des Gondoles, en laquelle s’estoient iettez quelques Matachins imperitz de la marine, cuydans fanfarer & bouffonner sus eaue, comme ilz font tresbien en terre ferme. Telle Naumachie estoit assignee pour le dimenche dixieme de ce mois.
La Sciomachie par terre fut faite au ieudi subsequent. Pour laquelle mieux entendre est à noter, que pour icelle aptement parfaire fut eslue la place de san Apostolo, par ce qu’apres celle d’Agone, c’est la
