Le texte de cette page a été corrigé et est conforme au fac-similé.
29
TRAGEDIE
HERMIONE.
Seigneur, ie le voy bien, voſtre ame préuenuë
Répand ſur mes diſcours le venin qui la tuë,
Toûjours dans mes raiſons cherche quelque détour,
Et croit qu’en moy la haine eſt vn effort d’amour.
Il faut donc m’expliquer. Vous agirez enſuite.
Vous ſçauez qu’en ces lieux mon deuoir m’a conduite,
Mon deuoir m’y retient, & ie n’en puis partir,
Que mon Pere, ou Pyrrhus ne m’en faſſe ſortir.
Au nom de Menelas allez luy faire entendre,
Que l’Ennemy des Grecs ne peut eſtre ſon Gendre,
Du Troyen, ou de moy, faites-le decider :
Qu’il ſonge qui des deux, il veut rendre, ou garder.
Enfin qu’il me renuoye, ou bien qu’il vous le liure.
Adieu, s’il y conſent, ie ſuis preſte à vous ſuiure.
