Quis nescit, Volesi Bithynice, qualia demens
Ægyptus portenta colat ? Crocodilon adorat
Pars hæc, illa pavet saturam serpentibus ibin.
Effigies sacri nitet aurea cercopitheci,
Dimidio magicæ resonant ubi Memnone chordæ,
Atque vetus Thebe centum jacet obruta portis.
Illic æluros, hic piacem fluminis, illic
Oppida tota canem venerantur, nemo Dianam.
Porrum et cepe nefas violare et frangere morsu.
O sanctas gentes, quibus hæc nascuntur in hortis
Numina ! Lanatis animalibus abstinet omnis
Mensa : nefas illic fetum jugulare capellæ ;
Carnibus humanis vesci licet. Attonito quum
Tale super cœnam facinus narraret Ulysses
Alcinoo, bilem aut risum fortasse quibusdam
Moverat, ut mendax aretalogus. In mare nemo
Hunc abicit, sæva dignum veraque Charybdi,
Fingentem immanes Læstrygonas atque Cyclopes ?
Nam citius Scyllam, vel concurrentia saxa
Cyanes, plenos et tempestatibus utres
Crediderim, aut tenui percussum verbere Circes,
Et cum remigibus grunisse Elpenora porcis.
Tam vacui capitis populum Phæaca putavit ?
Page:Raoul - Trois satiriques latins, vol 1 Juvénal, 1842.djvu/354
Cette page n’a pas encore été corrigée
![](http://upload.wikimedia.org/wikipedia/commons/thumb/c/c5/Raoul_-_Trois_satiriques_latins%2C_vol_1_Juv%C3%A9nal%2C_1842.djvu/page354-1024px-Raoul_-_Trois_satiriques_latins%2C_vol_1_Juv%C3%A9nal%2C_1842.djvu.jpg)