Page:Reboul - Le Premier acte du Synode nocturne, 1608.djvu/49

49

cherche, & pour arriuer auec moins de difficulté aux fins de cette eſperance, il les faut appaſter cauteleuſement des deſpouilles de Calianthe : eſt-ce biẽ dict ? Ie m’aſſeure que c’eſt la plus courte voye, la raiſon eſt que le Factotum eſt extremement & naturellement deffiant, & autant tenant qu’homme de ſon eſpece qui n’a deſiré l’alliãce de Calianthe pour autre conſideration que pour le bruit qui a couru qu’il poſſedoit en ſa qualité plus de fortunes qu’aucun autre de la Prouince : & croyant qu’au premier vol de ſes ambitions, il aura encouru telle perte, ie vouë mon ame pour ſeruir de torchecul au plus affreux de tous les diables, ſi tout ne ſera al Bordel ou pour le moins en chemin : Ce pendant nous aurons de nouueaux aduis, & metodes toutes ſortantes de la broche, & comme nous voirrons nos premieres intentions reüſſir, nous-nous tiendrons ſur nos gardes, preſts & appareillez ou d’augmenter ou de diminuer ſelon la neceſſité de noſtre affaire : que ſi vous voulez ſuiure en ce poinct mon iugement & conſeil, ie me fais forte de tout l’embauſchement, d’autant que ayant vn penſionnaire en cette ville (comme lon ſçait), mes parolles les plus baſſes & moings energicques lui ſeruiront de commandement & d’Oracle, qui l’executera, & enſuiura ſur la riſque de ſa vie. Ie vous en donne parolle. Au ſurplus, mes bien-aymez enfans, ie vous commande autant que la puiſſance que vous m’auez volontairement ſur vous meſmes concedée porte, & s’eſtend, de me dire, toute crainte arriere, ce qui vous en ſemble, vous coniurant (qui plus eſt) par le ſang humain que nous auons tantoſt vnanimement beu, par les noirs & effroyables miſteres de noſtre Cabale,

G