12Que ceux qui ſeront comptables ne puiſſent
eſtre appellez à charge aucune quelle qu’elle
ſoit, iuſques apres la reddition & cloſture de leurs
comptes, & qu’ils ayent payé le reliqua s’ils ſont
redeuables : & ſi aucun donnoit voix ou ſuffrages
à vn comptable, ſoit condamné à vingt eſcus d’amẽde
qu’il payera prõptement à peine de priſon.
13Que les officiers ordinaires de la iuſtice
s’ils ſont cognus gens de bien, demeurent en leur
premier eſtat, pour l’exercer comme de couſtume,
& iuger abſoluement des cauſes de leur iuriſdiction,
auec conſeil de douze de la qualité requiſe.
Et ſi leſdicts officiers ordinaires, ne ſont gens
qui ayent accouſtumé de s’acquitter de leur deuoir,
& hors de toute chiquanerie : en les deſmettant,
le Maieur & conſeil de chacune ville en pourra
eſtablir d’autres, de la qualité requiſe & neceſſaire
pour exercer l’eſtat de iudicature : & ſeront
leſdicts officiers ſuiets à cenſures, reprimendes, &
chaſtiemens s’il y eſchet.
14Qu’entre tous leſdicts chefs & conſeils
particuliers, ils eſliſent vn chef general, à la façon
de Dictateur Romain, pour commander en la cãpagne :
auquel auſsi ceux des villes & citez obeiront
en tout ce qui ſera de ſa charge, pour le benefice
commun de leur conſeruation.
15La façon d’eſlire ce chef general ſeroit bõne,
ſi (comme les Ioniens, Doriens, Béotiens,
Achees, Dolopes, & autres peuples des douze floriſſantes
villes de Grece, qui pour aduiſer à leur
eſtat, s’aſſembloyent deux fois en l’an : ou comme
le conſeil des Amphictyons du temps de Pauſa-
