meurtrier ne paſſera point par leur terre : Cinq
d’entr’eux pourſuyuront cent de leurs ennemis, &
cent, dix mille. Le Seigneur eſtablira ſon alliance
auec eux, & les fera croiſtre & multiplier en paix
& abondance de toutes choſes neceſſaires : là où
au contraire, s’ils meſpriſent les ordonnances du
Dieu viuant, s’ils laiſſent regner les vices & deſbauches
parmi eux, la peur, le tremblement, les
maladies, & autres langueurs, & toutes ſortes de
maledictions les pourſuyuront : Le Seigneur tiẽdra
touſiours ſa face courroucee contr’eux : Ils
mourront par la main de leurs ennemis, & fuyrõt
ſans que nul ne les pourſuyue. Le Seigneur adiouſtera
auſsi (s’il n’y voit vn amendement) ſept fois
au double de leurs playes, comme il en a menacé
ſon peuple d’Iſrael, en la place duquel ils ont ſans
doute eſté plantez.
26Qu’à l’execution d’vne ſi ſaincte œuure,
qu’eſt l’eſtabliſſement & obſeruation de la diſcipline
eccleſiaſtique, à vn frein tant ſainct & neceſſaire,
les Magiſtrats tienent la main aux Conſiſtoires
dans les villes : & à la campagne, le General,
ſon conſeil, ou autres capitaines, & tant qu’il y aura
de gens de bien en l’armee.
27Qu’on introduiſe auſsi & qu’on pratique
le plus exactement que faire ſe pourra, entre tous
les capitaines, chefs mineurs, & ſoldats, la diſcipline
militaire, de laquelle ne ſera ia beſoĩ faire beaucoup
d’articles & ordõnances : eſtant la multitude
d’icelles (ſi les chefs font leur deuoir) ſuperflue, &
ne le faiſãt point, pernicieuſe & dõmageable. Il ſuffira
que toute la diſcipline militaire ſoit puiſſãte
