pleureront & ſe lamenteront à cauſe d’elle, quand
ils verront la fumee de ſon bruſlement : Lors dy-ie,
qu’il n’y aura plus nuls Chananeens en la maiſon
du Seigneur des armees. Et que tous ceux qui
ſeront demeurez de reſte, de toutes les natiõs qui
auront fait la guerre à l’Egliſe de Dieu, adorerõt
le Roy le Seigneur des armees. Ainſi que la predict
Zacharie en ſa Prophetie.
L’hiſt. Ie l’eſpere auſsi tout ainſi. Cependant noſtre
deuoir eſt, de marcher en tout prudemment,
& d’attendre en toute patience ce temps là que le
Pere a mis en ſa puiſſance.
Bien le pouuons nous prier qu’il abbrege ces
iours-là, & qu’il haſte la vocation de ſes eſleus.
Le pol. Tu dis vray. Or le prions donc à genoux,
s’il te plaiſt de faire les prieres ie te ſuyuray de
tout mon cœur,
L’hi. Ie le veux bien. Prions,
Seigneur Dieu Pere eternel & tout puiſſant,
Nous tes poures ſeruiteurs, ayans eſté tranſportez
par ta grace, du Royaume tenebreux, au Royaume
de lumiere, & toſt apres employez par ton
Egliſe en des charges importantes à ton ſeruice :
Te rendons graces, nous te louons, nous te magnifions
Seigneur, pour les biens infinis (& qui, à
dire vray, nous ſont incomprehenſibles) que tu
nous diſtribues iournellement de ta liberale & infatigable
main, de ce que par ton bras fauorable
tu nous as conduits & ramenez nous ayant adminiſtré
les choſes neceſſaires à noſtre voyage, &
nous deliurãt des dangers auſquels nous ſommes
expoſez le plus ſouuent pour nos pechez. Nous
