Quand il afferme n’auoir moins de ſoin de l’eſtat
auenir que de l’eſtat preſent de ſa Republicque :
he Dieu, quelle laſcheté voila.
L’hi. Ie t’aſſeure l’amy que ſi la Royne & ſon Conſeil
ou le Parlement d’Angleterre ny remedie,
qu’ils ſont venus comme à la veille de voir la ſubuerſion
de leur eſtat & de la Religion enſemble.
Le pol. Ha miſerables ! Et que tardent-ils, qui les
empeſche d’y mettre la main deuant la main ?
L’hi. Rien ne les en deſtourne que la deſbauche
& la vanité de la cour, les delices des Prelats, la ſuperbe
des nobles : Et pour le dire en vn mot le
peu de zele que la plus part des Anglois a enuers
le ſeruice de Dieu. Et Dieu par ſon ſecret iugement,
pour ſe venger de telle laſcheté tient cõme
en leſſe vne royne d’Eſcoſſe, que chacun cognoiſt
aſſez plus proche de la Couronne d’Angleterre,
pour la laſcher tout auſsi toſt apres la mort de ceſte-cy.
Et Dieu ſcait quel remuement on y verra
s’ainſi aduient.
Le pol. O Seigneur ! Et vit-elle encore ceſte fatale
Medee ? Qui euſt iamais cuydé cela ? Catherine de
Medicis, & les enfans ont bien ſurpaſſé en luxure,
en cruauté & perfidie treſtous leurs deuanciers
tyrans, ils les ont dy ie, iuſtifiez, & aboly le plus de
leur renom : Mais apres ceux-là, ie croy certes
qu’on doit l’honneur à ceſte-cy, d’auoir couché à
toutes reſtes ſon eſtat, honneur & grandeur, & rafreſchy
en plus de ſortes le ieu tragique malheureux.
Il ſembloit bien que ſa priſon la deuoit auoir
priuee des moyens de continuer ſes deportemens :
Mais à ce que l’on a veu la violence de ceſt
