eſtre, que les Senateurs auoyent auſsi bonne enuie
de ſe ſcauoir comme le peuple. Mais pour ce
que Manlius n’en reſpondoit point pertinẽment,
ains en tergiuerſant diſoit qu’il n’eſtoit ia beſoin
de leur dire ce que eux meſmes ſcauoyent trop
mieux, il fut mis en priſon par l’authorité du Dictateur,
qui de calomniateur fit deuenir par ce
moyen Manlius accuſateur. Et eſtant par apres
ſa ſauſſeté & enuie cognue fut chaſtié, comme il
le meritoit.
Par là & par autres exemples auenus en beaucoup
de Republiques mal ordonnees l’on peut
voir aiſément, combien de maux peuuent auenir
en vn eſtat grand ou petit au detriment de la liberté
ciuile : ſi ceſt ordre & liberté de pouuoir accuſer
quiconque ſoit d’entre les grans ny eſt eſtably.
Noſtre Frãce depuis que l’ordre des trois eſtats
a eſté ſupprimé, que les offices de Iudicature de
Conſeillers & Preſidens, &, pour le dire en
vn mot, depuis que la police & la iuſtice a eſté eſtouffee
& corrompue, vendue en gros & en menu
en a produit d’exemples lamentables.
Il ne faut que ſe remettre en memoire les calamitez
auenues pour le maſſacre fait à Vaſſy par
le duc de Guyſe : & celles qui ont enſuyui la coniuration
du Triumuirat, contre lequel nul n’oſoit
mot ſonner, quoyque l’on ſceuſt ſes entrepriſes.
Auſquelles on n’oſa s’oppoſer qu’auec vne biẽ
forte armee, la quelle ſuyuie de pluſieurs guerres
ciuiles a fait tomber la poure France de la fieure
en vn chaut mal, comme l’on dit.
Page:Reveille-matin des François, 1574.djvu/329
Le texte de cette page a été corrigé et est conforme au fac-similé.
123
D I A L O G V EI I.
