ſi haute vertu : Ce que Salomon enſeigne myſtiquement, quand il nous recommande que nos veſtemens ſoient toûjours blancs.
Elle a la teſte voilée, pour nous apprendre, Qu’vne honneſte femme doit tenir cachée ſa beauté, pluſtoſt que d’en faire monſtre : A raiſon dequoy Tertullien appelle le Voile, vn Bouclier de modeſtie, & vn Rempart que l’on ne peut battre en ruine. Pour cela meſme les anciens Romains vouloient que la Pudicité fuſt touſiours peinte auec le viſage couuert, cõme il ſe peut voir en la Medaille de Sabine, femme de l’Empereur Adiran ; Et en celle de Marcia, Otacilla, Seuera, auec ce mot, Pudicitia Aug. Les femmes Iuiſues eſtoient encore voilées, & les Chrétiennes auſſi, quand elle faiſoient leurs prieres dans le Temple ; autrement elles n’y pouuoient entrer. Sainct Paul l’ordonna comme cela, & Sainct Pierre pareillement, dont le ſucceſſeur, qui fut le pape Linus, voulut depuis que cette couſtume fuſt religieuſement obſeruée.
Elle tient vn Lys en la main droite ; à cauſe que cette fleur, comme le remarque S. Hieroſme contre Iouinian, eſt vn Hyerogliphe de la Pudicité. Et voilà pourquoy dans le Cantique des Cantiques il eſt dit, Que l’Eſpouſe celeſte prend ſa nourriture parmy les Lys, c’eſt-à-dire en la compagnie des perſonnes que la Chaſteté rend recommendables.
Quant à la Tortuë qu’elle foule aux pieds, cela veut dire, Que les femmes chaſtes ne doiuent non plus bouger de leur maiſon, que cét animal de deſſous le toict où la Nature l’a renfermé. Cette penſée eſt du fameux Sculpteur Phidias, & du grand Hiſtorien Thucidide, qui dit, au rapport de Plutarque, Qu’il faut qu’vne femme de bien ait ſes promenades bornées dans l’enclos de ſon logis.
