L’esté.
L ne peut mieux eſtre dépeint, ce me ſemble, qu’il
eſt icy, par vne ieune Fille couronnée d’eſpics, veſtuë
de jaulne, & qui tient vne Torche allumée.
Elle eſt peinte jeune, dautant que l’Eſté ſe peut nommer proprement la jeuneſſe de l’année, pource que la chaleur de la terre eſt alors plus en ſa force qu’en tout autre temps, pour faire meurir les fruicts que la nature produit.
La Guirlande dont elle eſt couronnée faite d’eſpics, eſt le Symbole du principal fruict que donne cette Saiſon.
On l’habille de jaulne, pour la reſſemblance qu’a cette couleur auec le bled quand il eſt en ſa maturité.
Quant au Flambeau allumé qu’on luy met en main, il denote Matham. lib. 2. proprement la grande chaleur que le Soleil rend en Eſté, comme le remarque le Poëte Ouide.
A ce que ie viens de dire on peut ajouſter que les Anciens, au rapport de Gregoire Giraldi, repreſentoient ordinairement l’Eſté par la Deeſſe Cerés, qu’ils habilloient en Dame majeſtueuſe & d’aage robuſte, luy faiſant tenir des faiſſeaux d’eſpics, des pauots, & d’autres plantes qui luy eſtoient conuenables.
L’avtomne.
L ſe voit icy ſous la figure d’vne Femme que ſon
embompoint rend remarquable auſſi bien que ſon
habillement qui eſt fort riche ; Elle eſt couronnée
d’vne Guirlande de Pampres ; outre que de la main
droite elle tient vn gros Raiſin, & de la gauche vne Corne
d’Abondance, plein de fruicts de diuerſes ſortes.
Elle eſt peinte d’vn aage viril, à cauſe que la ſaiſon de l’Automne, eſt appellée la virilité de l’année. Et ſi les Poëtes la nomment ainſi, c’eſt pour monſtrer que la terre eſt alors diſposée à donner aux hommes les fruicts que la chaleur de l’Eſté a meurris, & de ſe deſpoüiller des fueilles & des ſemences, eſtant comme laſſée d’engendrer.