Glovtonnie.
A Gourmandiſe eſt en effet telle qu’on la voit dans
cette Figure. Elle a vn col de Gruë, pour gouſter
plus long-temps, & plus delicieuſement le Vin &
les Viandes, qu’elle tient en l’vne & en l’autre main ;
Et comme elle eſt inſatiable, ce n’eſt pas merueille ſi elle a le
ventre ſi gros, veu qu’elle ne penſe qu’à s’engraiſſer, à l’imitation
du Pourceau qui l’accompagne.
Heresie.
’Hereſie eſt vne erreur de l’eſprit, à laquelle
la volonté s’attache opiniaſtrement, contre la vraye creance qu’il faut auoir. Elle eſt peinte
vieille, pour monſtrer, que ce n’eſt pas d’auiourd’huy qu’il y a des Heretiques, qui s’efforcent,
mais en vain, d’esbranler les fondemens de la Religion. Par la
Flamme qui luy ſort de la bouche, il eſt demonſtré qu’elle publie
enſemble la fauſſe Doctrine & la Sedition, dont elle eſt le
ſanglant Boute-feu ; Par les Cheueux eſpars, que les fauſſes opinions
s’eſpandent de tous coſtez ; par la Nudité, qu’elle eſt depoüillée de toute Vertu ; & par les diuers Serpens qui ſortent
du Liure qu’elle tient en main, que les fauſſes Inſtructions qu’elle donne ſont incomparablement plus contagieuſes que n’eſt
le venin des Aſpics & des Dragons, quelque dangereux &
nuiſible qu’il puiſſe eſtre.
Hippocrisie.
Oyez vn peu s’il ſe peut rien imaginer de plus
trompeur que l’Hippocriſie. Elle eſt paſle & deffaite, pour monſtrer que ſi elle ſe mortifie, c’eſt
pour mieux deceuoir autruy par vne vaine apparence.
Auſſi eſt-ce pour la meſme raiſon qu’elle ſe couure
la teſte d’vn Voile noir, & le corps d’vne Robe toute
rapiecée, tenant d’vne main vn Chappellet, & vn Liure de
prieres ; & de l’autre donnant l’Aumoſne à vn Pauure deuant
tout le monde : Ce qu’elle fait afin de pareſtre en l’exterieur
telle qu’vn Agneau, quoy que par dedans elle ſoit vn Loup rauiſſant ;
Et voila pourquoy ce n’eſt pas ſans cauſe qu’on luy en donne icy les pieds.
