dement, auant que de les repreſenter par les couleurs, doiuent demeurer comme cachées, & ne point paroiſtre que le Tableau ne ſoit entierement acheué. Car comme parmy les Orateurs c’eſt vn grand Art de ſçauoir feindre qu’on parle ſans Art ; ainſi dans la profeſſion des Peintres, c’eſt vn ſecret merueilleux de ſçauoir Peindre de telle ſorte que ce qu’il y a de plus recommandable à la Peinture ne ſoit apperceu que par ceux qui s’y connoiſſent le mieux.
Poesie.
Ette ieune Dame couuerte d’vne Robe de couleur
celeſte, toute ſemée d’Eſtoiles, repreſente la
Poëſie. Elle a ſur la teſte vne Couronne de Laurier,
le ſein deſcouuert, & le viſage enflammé, outre
que de la main droite elle tient vn Clairon ; & de la gauche
vne Viole, ou ſi vous voulez vne maniere de Lyre.
La Poëſie ſelon Platon, eſt proprement vne expreſſion des choſes Diuines, qui par vne grace particuliere du Ciel ſont comme inſpirées dans l’eſprit du Poëte.
On la peint ieune & belle, pource qu’il n’eſt point d’Homme, ſi brutal & ſi barbare ſoit-il, qu’elle ne charme par ſes agréemens & par ſes beautez.
On la couronne de Laurier, Arbre touſiours verdoyant, & qui ne craint point la foudre, pour monſtrer qu’elle rend les Hommes immortels, en les mettant à couuert des iniures du Temps, qui deſtruit ordinairement & fait oublier la pluſpart des choſes du monde.
Sa Robe pleine d’Eſtoiles eſt vn ſymbole de ce Diuin eſclat qui brille dans les ouurages des excellens Poëtes.
Son Sein deſcouuert, dont on ſuppoſe que les mammelles ſont pleines de Laict, figurent la Fecondité des belles penſées, & des inuentions diuerſes qui ſont comme l’Ame de la Poëſie. Auſſi eſt-elle penſiue en effect, & paroiſt auec vn viſage tout enflammé, pource que les grands Poëtes ont pour l’ordinaire l’eſprit eſchauffé de certains tranſports & mouuemens violens ſemblables à la fureur.
Elle tient au reſte vne Lyre d’vne main, & vn Clairon de l’autre, dautant que par la douceur des beaux Vers, elle rend
